Høg arbeidspendling mellom kommunane

Pendling er definert som ei arbeidsreise der arbeidstakar kryssar minst ei kommunegrense. Pendling blir skapt der det er underskot på arbeidsplassar i forhold til arbeidsstyrken. I 2014 var det 136 789 sysselsette personar busett i Møre og Romsdal og 131 844 sysselsette med arbeidsstad i fylket. Dette gav ei underdekning på arbeidsplassar på 4 945. I 2014 var det 9 951 personar som arbeidspendla ut av fylket, medan 5 006 personar pendla inn. I prosent gav dette ei utpendling på 7,3 prosent av alle sysselsette busett i fylket og ei innpendling på 3,8 prosent av sysselsette med arbeidsstad i fylket.

Blant pendlarane var det fleire menn enn kvinner. I Møre og Romsdal er det relativt høg arbeidspendling, og pendlarmatrisa indikerer at det er høg utveksling av arbeidskraft mellom kommunane. I 2014 var om lag eín av fire sysselsette pendlarar. Målt i absolutte tal var innpendlinga størst til Ålesund, med 8 486 personar. Deretter følgjer Molde, Ulstein og Kristiansund kommunar. Målt i forhold til arbeidsplassar var innpendlinga størst til Ulstein, med 44,8 prosent. Det betyr at nærare annankvar arbeidstakar i Ulstein arbeidspendla til kommunen i 2014. I 2014 var det 4 905 personar som pendla ut frå Ålesund. Også frå Sula og Fræna var det stor utpendling. I prosent var utpendlinga størst frå Skodje, med 64,6 prosent.

Blant kommunane var det ti kommunar som hadde ei utpendling på meir enn 40 prosent. At arbeidspendlinga er høg i Møre og Romsdal kjem også til uttrykk ved at dei fleste kommunane i fylket hadde netto utpendling i 2014. Unntaka var Molde, Ålesund, Ulstein og Sunndal. Dette er kommunar med høg arbeidsplassdekking, altså med fleire arbeidsplassar enn sysselsette busett i kommunen. Pendlingsmatrisa viser at det er høg innpendling til desse fire kommunane frå dei kommunane som ligg kring.

Kristansund er den einaste av dei tre store byane som har netto utpendling.