Flest menn sysselsette på korttidsopphald
Per 4. kvartal i 2013 var det 4 715 sysselsette på korttidsopphald i Møre og Romsdal. Det var ein auke på nærare 1 000 personar, eller over 26 prosent, samanlikna med same tid i 2012. Denne gruppa utgjorde i 2013 3,5 prosent av alle sysselsette i Møre og Romsdal. Dette var ein auke frå 2012, då delen sysselsette på korttidsopphald utgjorde 2,8 prosent av totalen. Delen sysselsette på korttidsopphald har auka jamt sidan 2010, og i 2013 var det 1 082, eller 29,8 prosent, fleire sysselsette på korttidsopphald i fylket enn i 2009.
Fleirtalet av dei sysselsette på korttidsopphald i Møre og Romsdal i 2013 kom frå EU-land i Aust-Europa. Dei utgjorde 3 575 personar, eller 75,8 prosent av dei sysselsette på korttidsopphald. Den nest største gruppa kom frå land i Norden, og utgjorde 13 prosent. Delen sysselsette på korttidsopphald frå EU-land i Aust-Europa auka med over 29 prosent frå 2012 til 2013, medan delen frå land i Norden heldt seg relativt stabil, med ein beskjeden auke på 0,3 prosent.
Viss ein samanliknar fylka i landet, har Oslo klart flest sysselsette på korttidsopphald, med nær 18 000 personar. Akershus og Rogaland har også ein stor del sysselsette på korttidsopphald, med høvesvis 10 120 og 9 817 personar. Møre og Romsdal ligg sjette høgast i rangeringa av fylka, med
4 715 personar – same plass som i 2012. Færrast sysselsette på korttidsopphald finn vi i Aust-Agder (837 personar), Nord-Trøndelag (1 148 personar), Troms (1 250 personar) og Finnmark (1 282 personar).
Det er flest menn som kjem til Møre og Romsdal for å arbeide over kortare tid. Slik har det også vore dei siste åra. I 2013 var 4 172 av 4 715 sysselsette på korttidsopphald menn. Kvinnene utgjorde berre 11,5 prosent. Dette er ein nedgang frå 2012, då delen kvinner låg på 13,7 prosent.
